مراجعة تويوتا كورولا (2014-2019)

المحرك والأداء

بتشتغل السيارة بمحرك بنزين 1.6 لتر 4 سلندر 16 صمام بنظام VVT-i المزدوج، بيدي قوة حوالي 120 حصان عند 6000 لفة وعزم دوران 154 نيوتن.متر عند 5200 لفة، مربوط بناقل حركة CVT بيدفع العجلات الأمامية. العربية بتوصل من الصفر لـ100 كم/س في حوالي 12 ثانية والسرعة القصوى حوالي 180 كم/س، واستهلاك الوقود حوالي 6 لتر لكل 100 كم وهو رقم كويس جداً لفئتها. فيه زرار Sport Mode بيدي احساس قيادة أرياضي شوية بس بيزود الاستهلاك. الفتيس CVT بيدي نقلات ناعمة جداً من غير هزات.

الصالون ومساحة الجلوس

طول العربية 4.62 متر وعرضها 1.775 متر وقاعدة العجلات 2.7 متر، والصالون واسع ومريح وقريب في الاتساع من كامري الأكبر. الشنطة الخلفية بتاخد لغاية 440 لتر وهي حجم كويس للعيلة. المقاعد مريحة والديكور الداخلي فخم نسبياً بس فيه استخدام بلاستيك واضح في أجزاء من الصالون، والعزل الصوتي كويس لكن بيبان صوت هواء واضح في السرعات العالية.

الصيانة وإعادة البيع

قطع غيار كورولا متوفرة بكثرة جوه وبره التوكيل بأسعار معقولة، والعربية معروفة بقلة أعطالها. من ناحية إعادة البيع، كورولا بتحافظ على قيمتها كويس جداً في السوق المصري، لكن الجيل ده تقفيله تركي مش ياباني زي الجيل اللي قبله وده بيفرق شوية في جودة التجميع.